kaise sach se rahe be-KHabar aaina

kaise sach se rahe be-ḳhabar aa.ina

aaj ḳhush hai bahut TuuT kar aa.ina

har taraf be-zamīrī nazar aa.egī

ho gayā gar ye puurā nagar aa.ina

aa.ina log ghar meñ sajāte haiñ par

maiñ ne kar Daalā puurā hī ghar aa.ina

jhūThe chehroñ ko sachchā batātā sadā

rakhtā insāñ sī fitrat agar aa.ina

aa.ine kī hai ik aur ḳhūbī suno

sab ko aatā nahīñ hai nazar aa.ina

lag na jaa.e koī daaġh kirdār par

zinda rakhtā hai dil meñ ye Dar aa.ina

sirf sūrat nahīñ jis meñ sīrat dikhe

aisā ban kar chale ham-safar aa.ina

vo badalte haiñ kirdār din meñ ka.ī

dekhte haiñ jo shām-o-sahar aa.ina

mujh ko dete haiñ ab vo nasīhat 'sachin'

dekh paa.e na jo umr-bhar aa.ina

kaise sach se rahe be-KHabar aaina

aaj KHush hai bahut TuT kar aaina

har taraf be-zamiri nazar aaegi

ho gaya gar ye pura nagar aaina

aaina log ghar mein sajate hain par

main ne kar Dala pura hi ghar aaina

jhuThe chehron ko sachcha batata sada

rakhta insan si fitrat agar aaina

aaine ki hai ek aur KHubi suno

sab ko aata nahin hai nazar aaina

lag na jae koi dagh kirdar par

zinda rakhta hai dil mein ye Dar aaina

sirf surat nahin jis mein sirat dikhe

aisa ban kar chale ham-safar aaina

wo badalte hain kirdar din mein kai

dekhte hain jo sham-o-sahar aaina

mujh ko dete hain ab wo nasihat 'sachin'

dekh pae na jo umr-bhar aaina