kaise sunaun gham ki kahani sanson par hai bar bahut

kaise sunā.ūñ ġham kī kahānī sāñsoñ par hai baar bahut

maazī kahtā hai kah jaao haal ko hai inkār bahut

aap pashemāñ āḳhir kyoñ haiñ mujh ko kuchh bhī yaad nahīñ

kis kī mohabbat kaisī kahānī kis se kiyā thā pyaar bahut

TuuTā maazī kā ā.īna yādoñ kī bikhrī kircheñ

zehn ke zaḳhmī talve ab haiñ chalne se bezār bahut

pau phūTe par kashti-e-dil thī varta-e-zulmat hī meñ abhī

yuuñ to chalā.ī shab ke samundar meñ ham ne patvār bahut

bhaag chalūñ yādoñ ke zindāñ se aksar sochā lekin

jab bhī qasd kiyā to dekhā ūñchī hai dīvār bahut

ThiThkā to thā phir jaane kyā soch ke aage baḌhtā gayā

pā-e-vafā meñ yuuñ to chubhe the terī jafā ke ḳhaar bahut

tark-e-ta.alluq se ik merā dil hī nahīñ hai kuchh zaḳhmī

tiir hue hī hoñge tere siine ke bhī paar bahut

kaise sunaun gham ki kahani sanson par hai bar bahut

mazi kahta hai kah jao haal ko hai inkar bahut

aap pasheman aaKHir kyon hain mujh ko kuchh bhi yaad nahin

kis ki mohabbat kaisi kahani kis se kiya tha pyar bahut

TuTa mazi ka aaina yaadon ki bikhri kirchen

zehn ke zaKHmi talwe ab hain chalne se bezar bahut

pau phuTe par kashti-e-dil thi warta-e-zulmat hi mein abhi

yun to chalai shab ke samundar mein hum ne patwar bahut

bhag chalun yaadon ke zindan se aksar socha lekin

jab bhi qasd kiya to dekha unchi hai diwar bahut

ThiThka to tha phir jaane kya soch ke aage baDhta gaya

pa-e-wafa mein yun to chubhe the teri jafa ke KHar bahut

tark-e-talluq se ek mera dil hi nahin hai kuchh zaKHmi

tir hue hi honge tere sine ke bhi par bahut