کیسے اس کو بھول سکے دل کیسے اپنے جی کو سنبھالے

کیسے اس کو بھول سکے دل کیسے اپنے جی کو سنبھالے

اس کی صورت گوشے گوشے اس کی مورت آلے آلے

اس کی ضیا سے چاندنی چھٹکی اس کی صدا سے غنچے چٹکے

اس کو چھو کر کیا پوچھو ہو باد صبا نے پیر نکالے

اس کی ادا پر مر مٹتا ہے اس کے نام پہ جی اٹھتا ہے

جانے اس میں ایسا کیا ہے جو بھی دیکھے دل دے ڈالے

اس کا تکلم روح غزل ہے اس کی خموشی موجۂ طغیاں

بستی بستی اس کے چرچے دریا دریا اس کے نالے

سب کے دلوں پر اس کی حکومت سب کے لبوں پر اس کی شکایت

نیچی نظر سے جی خوش کر دے ترچھی نظر سے مار بھی ڈالے

در پر اس کے بھیڑ لگی ہے خلقت ہے کہ ٹوٹ پڑی ہے

اک آفت میں جان پھنسی ہے کس کو روکے کس کو ٹالے

ندی نالے سوکھ چکے ہیں صحراؤں سے چشمے ابلے

آنکھ سے آنسو خشک ہوئے تو پھوٹ کے روئے پاؤں کے چھالے

بنت عنب گر ساتھ نہ دیتی فرقت کی شب آنکھ نہ لگتی

جام‌ مئے گلفام کے صدقے جس نے آنکھ میں ڈورے ڈالے

تم نے تو دیکھا ہے ان کو یاد تو ہوں گے تم کو بھی وہ

سیدھے سادے بھولے بھالے ایک تمیزؔ جی دلی والے