kaisi hai aah apni tabiat bhari hui

kaisī hai aah apnī tabī.at bharī huī

āñkhoñ meñ ashk ashk meñ hasrat bharī huī

aTkheliyāñ na kar tū nasīm-e-sahar ki hai

rag rag meñ un guloñ kī nazākat bharī huī

kyuuñ be-sabab hujūm-e-tamannā-o-yās se

hai is dil-e-hazīñ kī imārat bharī huī

kis jā karegā mayyat-e-ushshāq dafn tū

yaañ hai shahīd-e-nāz kī turbat bharī huī

gar jaam tū pilā.e to piinā halāl hai

tujh meñ to sāqiyā hai malāhat bharī huī

kyuuñ kar gadā na tere ġhanī huuñ sanam ki hai

dast-e-karam meñ tere saḳhāvat bharī huī

ifshā-e-rāz-e-ishq na ho ḳhauf hai yahī

chhuptī nahīñ hai aañkh mohabbat bharī huī

tum dekh lo 'jamīla' ki dil ġham huā na ho

āñkhoñ meñ un ke kyuuñ hai nadāmat bharī huī

kaisi hai aah apni tabiat bhari hui

aankhon mein ashk ashk mein hasrat bhari hui

aTkheliyan na kar tu nasim-e-sahar ki hai

rag rag mein un gulon ki nazakat bhari hui

kyun be-sabab hujum-e-tamanna-o-yas se

hai is dil-e-hazin ki imarat bhari hui

kis ja karega mayyat-e-ushshaq dafn tu

yan hai shahid-e-naz ki turbat bhari hui

gar jam tu pilae to pina halal hai

tujh mein to saqiya hai malahat bhari hui

kyun kar gada na tere ghani hun sanam ki hai

dast-e-karam mein tere saKHawat bhari hui

ifsha-e-raaz-e-ishq na ho KHauf hai yahi

chhupti nahin hai aankh mohabbat bhari hui

tum dekh lo 'jamila' ki dil gham hua na ho

aankhon mein un ke kyun hai nadamat bhari hui