kaisi mani ki qaba rishton ko pahnai gai

kaisī mā'nī kī qabā rishtoñ ko pahnā.ī ga.ī

ek hī lamhe meñ barsoñ kī shanāsā.ī ga.ī

har dar-o-dīvār par bachpan javānī naqsh the

kab mire ghar se mire maazī kī dārā.ī ga.ī

is qadar ūñchī huī dīvār-e-nafrat har taraf

aaj har insāñ se insāñ kī pazīrā.ī ga.ī

har nayā din dhuup kī kirnoñ se tap kar aa.e hai

jism se ThanDak ga.ī āñkhoñ se bīnā.ī ga.ī

ab kahāñ vo mastiyāñ sargoshiyāñ gul-reziyāñ

dāman-e-sahrā se jo aatī thī purvā.ī ga.ī

vaqt kī sauġhāt hai na ham haiñ ham na tum ho tum

zehn se socheñ ga.iiñ hoñToñ se sachchā.ī ga.ī

aaj phir hai hukmrānī tīrgī kī har taraf

raushnī ik pal ko 'sābir' aa.ī aur aa.ī ga.ī

kaisi ma'ni ki qaba rishton ko pahnai gai

ek hi lamhe mein barson ki shanasai gai

har dar-o-diwar par bachpan jawani naqsh the

kab mere ghar se mere mazi ki darai gai

is qadar unchi hui diwar-e-nafrat har taraf

aaj har insan se insan ki pazirai gai

har naya din dhup ki kirnon se tap kar aae hai

jism se ThanDak gai aankhon se binai gai

ab kahan wo mastiyan sargoshiyan gul-reziyan

daman-e-sahra se jo aati thi purwai gai

waqt ki saughat hai na hum hain hum na tum ho tum

zehn se sochen gain honTon se sachchai gai

aaj phir hai hukmrani tirgi ki har taraf

raushni ek pal ko 'sabir' aai aur aai gai