کیسی الجھن ہے سوچتا کیا ہے

کیسی الجھن ہے سوچتا کیا ہے

صاف کہہ دے کہ مدعا کیا ہے

حسرتیں یاس زخم محرومی

اور اس دل میں اب بچا کیا ہے

ہر گھڑی بے کلی و بے زاری

اے مرے دل تجھے ہوا کیا ہے

چاہتی کیا ہے کچھ تو واضح ہو

زندگی تیرا مدعا کیا ہے

دل کروں نذر یا کہ جان نثار

بول اے دوست چاہتا کیا ہے

قتل و خوں رنجشیں فریب دغا

آہ اب اس کے ماسوا کیا ہے

کیا بتائیں گے اگلی نسل کو ہم

پیار کیا چیز ہے وفا کیا ہے

وہ تباہی پہ میری ہنس کے سلیمؔ

بس یہی کہہ سکے ہوا کیا ہے