kal ek shaKHs jo achchhe-bhale libas mein tha

kal ek shaḳhs jo achchhe-bhale libās meñ thā

barahna aaj vo utrā huā gilās meñ thā

ham āftāb-e-daraḳhshāñ jise samajhte the

vo ek vahm kā jugnū havas kī ghaas meñ thā

zamīn-o-arsh kī taqsīm ke zamāne meñ

bashar asīr-e-junūñ thā kahāñ havās meñ thā

azal se pahle hī dhun thī husūl-e-paikar kī

ye kā.enāt kā ḳhāka mire qayās meñ thā

maiñ kyā sulagte samundar se māñgtā paanī

vo ḳhud bhī ek zamāne se ġharq pyaas meñ thā

use nasīb kafan bhī nahīñ huā āḳhir

ki hisse-dār jo us khet kī kapās meñ thā

ham us savāl kā ab tak javāb de na sake

jo ik 'figār' kī pur-ashk chashm-e-yās meñ thā

kal ek shaKHs jo achchhe-bhale libas mein tha

barahna aaj wo utra hua gilas mein tha

hum aaftab-e-daraKHshan jise samajhte the

wo ek wahm ka jugnu hawas ki ghas mein tha

zamin-o-arsh ki taqsim ke zamane mein

bashar asir-e-junun tha kahan hawas mein tha

azal se pahle hi dhun thi husul-e-paikar ki

ye kaenat ka KHaka mere qayas mein tha

main kya sulagte samundar se mangta pani

wo KHud bhi ek zamane se gharq pyas mein tha

use nasib kafan bhi nahin hua aaKHir

ki hisse-dar jo us khet ki kapas mein tha

hum us sawal ka ab tak jawab de na sake

jo ek 'figar' ki pur-ashk chashm-e-yas mein tha