کل خود مجھے رسوا سر بازار کرو گے

کل خود مجھے رسوا سر بازار کرو گے

تم صبح سے پہلے مرا انکار کرو گے

خیر اب تو ہوئے مسخ روایت کے کھرے دام

کیا کل بھی یہی جھوٹ کا بیوپار کرو گے

طوفان تو امڈا چلا آتا ہے سروں پر

پھر شہر کو کس لمحے خبردار کرو گے

آخر کو تو مٹی ہیں یہ مٹی کے گھروندے

تعمیر کہاں تک در و دیوار کرو گے

لو گے نہ خبر دل کے خرابے کی مگر ہاں

زیبائش ہر کوچہ و بازار کرو گے

میں اب تو کھٹکتا ہوں مگر دور نہیں وقت

باتیں مری پرکھو گے مجھے پیار کرو گے

ہے اپنے لیے شہر بشیرؔ اپنا یہی دشت

کیا جا کے بھلا شہر مرے یار کرو گے