kal patang usne jo bazar se mangwa bheja

kal patañg us ne jo bāzār se mañgvā bhejā

saada māñjhe kā use maah ne golā bhejā

naam kā us ke jo maiñ kah ke muammā bhejā

ye bhī harakat hai burī us ne ye farmā bhejā

us kī farmā.isheñ kyā kyā na bajā laayā maiñ

kabhī paTTā kabhī lachkā kabhī goTā bhejā

qais o farhād ko jāgīr yahī ishq ne dī

ek ko koh milā ek ko sahrā bhejā

sozan o shāna o ā.īna ḳharīde ham ne

kabhī bhejā bhī to us gul ko ye saudā bhejā

phir tah-e-ḳhāk mirā dāġh-e-jigar taaza huā

kis ne turbat pe mirī lāla-e-hamrā bhejā

āshiqoñ meñ use ginte nahīñ vārasta-mizāj

jis ne tā-nok-e-qalam harf-e-tamannā bhejā

dāġh-e-dil zaḳhm-e-jigar kulfat-e-ġham dard-e-firāq

hazrat-e-ishq ne kyā kyā nahīñ tohfa bhejā

'mus.hafī' jā ke vahāñ bhuul ga.e kyā ham ko

kabhī yārān-e-adam ne jo na purza bhejā

kal patang us ne jo bazar se mangwa bheja

sada manjhe ka use mah ne gola bheja

nam ka us ke jo main kah ke muamma bheja

ye bhi harakat hai buri us ne ye farma bheja

us ki farmaishen kya kya na baja laya main

kabhi paTTa kabhi lachka kabhi goTa bheja

qais o farhad ko jagir yahi ishq ne di

ek ko koh mila ek ko sahra bheja

sozan o shana o aaina KHaride hum ne

kabhi bheja bhi to us gul ko ye sauda bheja

phir tah-e-KHak mera dagh-e-jigar taza hua

kis ne turbat pe meri lala-e-hamra bheja

aashiqon mein use ginte nahin warasta-mizaj

jis ne ta-nok-e-qalam harf-e-tamanna bheja

dagh-e-dil zaKHm-e-jigar kulfat-e-gham dard-e-firaq

hazrat-e-ishq ne kya kya nahin tohfa bheja

'mushafi' ja ke wahan bhul gae kya hum ko

kabhi yaran-e-adam ne jo na purza bheja