kal qayamat hai qayamat ke siwa kya hoga

kal qayāmat hai qayāmat ke sivā kyā hogā

ai maiñ qurbān-e-vafā vāda-e-fardā hogā

hashr ke roz bhī kyā ḳhūn-e-tamannā hogā

sāmne ā.eñge yā aaj bhī pardā hogā

ham nahīñ jānte haiñ hashr meñ kyā kyā hogā

ye ḳhushī hai ki vafā va.ada-e-fardā hogā

tū batā de hameñ sadqe tire ai shān-e-karam

ham gunahgār haiñ kyā hashr hamārā hogā

laakh pardoñ meñ koī ai nigah-e-shauq rahe

dekh legā jo koī dekhne vaalā hogā

aisī le de huī aa kar ki ilāhī-tauba

ham samajhte the ki mahshar meñ tamāshā hogā

sa.ī har gaam meñ kī hai ye samajh kar ham ne

vahī hogā jo mashiyyat kā taqāzā hogā

pī ke aayā araq-e-sharm jabīñ par jo kabhī

chehre par bāda-kasho nuur barastā hogā

rahne degā na dam-e-zabh koī halq ko ḳhushk

mai-kade meñ hameñ itnā to sahārā hogā

mujhe kyā Dar hai ki hoñge mire sarkār shafī.a

mujhe kyā Dar hai ki tū baḳhshne vaalā hogā

sharm-e-isyāñ se nahīñ uThtī haiñ palkeñ apnī

ham gunahgār se kyā hashr meñ pardā hogā

ka.aba sunte haiñ ki ghar hai baḌe daatā kā 'riyāz'

zindagī hai to faqīroñ kā bhī pherā hogā

kal qayamat hai qayamat ke siwa kya hoga

ai main qurban-e-wafa wada-e-farda hoga

hashr ke roz bhi kya KHun-e-tamanna hoga

samne aaenge ya aaj bhi parda hoga

hum nahin jaante hain hashr mein kya kya hoga

ye KHushi hai ki wafa wada-e-farda hoga

tu bata de hamein sadqe tere ai shan-e-karam

hum gunahgar hain kya hashr hamara hoga

lakh pardon mein koi ai nigah-e-shauq rahe

dekh lega jo koi dekhne wala hoga

aisi le de hui aa kar ki ilahi-tauba

hum samajhte the ki mahshar mein tamasha hoga

sai har gam mein ki hai ye samajh kar hum ne

wahi hoga jo mashiyyat ka taqaza hoga

pi ke aaya araq-e-sharm jabin par jo kabhi

chehre par baada-kasho nur barasta hoga

rahne dega na dam-e-zabh koi halq ko KHushk

mai-kade mein hamein itna to sahaara hoga

mujhe kya Dar hai ki honge mere sarkar shafia

mujhe kya Dar hai ki tu baKHshne wala hoga

sharm-e-isyan se nahin uThti hain palken apni

hum gunahgar se kya hashr mein parda hoga

kaba sunte hain ki ghar hai baDe data ka 'riyaz'

zindagi hai to faqiron ka bhi phera hoga