کل شب اس کی یاد میں یوں آنکھ بھر آئی کہ بس

کل شب اس کی یاد میں یوں آنکھ بھر آئی کہ بس

صحن دل پر رنج و غم کی وہ گھٹا چھائی کہ بس

درد کے سائے تھے ہر بام و در و دیوار پر

جان لیوا اس قدر تھی گھر کی تنہائی کہ بس

تجھ سے شکوہ کیا کریں اب دل ہی کو سمجھائیں گے

تو تو ہرجائی ہے اور پھر ایسا ہرجائی کہ بس

جب تلک نا آشنا تجھ سے تھے سب کچھ ٹھیک تھا

اک قیامت ڈھا گئی تیری شناسائی کہ بس

ہر قدم پر سنگلاخوں کا سفر تھا اور میں

دشت الفت میں ہوئی وہ آبلہ پائی کہ بس

کھول ہی دیتا ترے سب راز دیوانہ تیرا

آستانہ سے ترے لیکن صدا آئی کہ بس

چاک کر ڈالا گریباں میں نے ان کو دیکھ کر

ہو گئی میری سر محفل وہ رسوائی کہ بس

یک بہ یک وہ ہو گئے بےچینؔ سن کر میرا نام

بولے سودائی ہے میرا ایسا سودائی کہ بس