kal shab uski yaad mein yun aankh bhar aai ki bas

kal shab us kī yaad meñ yuuñ aañkh bhar aa.ī ki bas

sahn-e-dil par ranj-o-ġham kī vo ghaTā chhā.ī ki bas

dard ke saa.e the har bām-o-dar-o-dīvār par

jān-levā is qadar thī ghar kī tanhā.ī ki bas

tujh se shikva kyā kareñ ab dil hī ko samjhā.eñge

tū to harjā.ī hai aur phir aisā harjā.ī ki bas

jab talak nā-āshnā tujh se the sab kuchh Thiik thā

ik qayāmat Dhā ga.ī terī shanāsā.ī ki bas

har qadam par sanglāḳhoñ kā safar thā aur maiñ

dasht-e-ulfat meñ huī vo ābla-pā.ī ki bas

khol hī detā tire sab raaz dīvāna terā

āstāne se tire lekin sadā aa.ī ki bas

chaak kar Daalā garebāñ maiñ ne un ko dekh kar

ho ga.ī merī sar-e-mahfil vo rusvā.ī ki bas

yak-ba-yak vo ho ga.e 'bechain' sun kar merā naam

bole saudā.ī hai merā aisā saudā.ī ki bas

kal shab us ki yaad mein yun aankh bhar aai ki bas

sahn-e-dil par ranj-o-gham ki wo ghaTa chhai ki bas

dard ke sae the har baam-o-dar-o-diwar par

jaan-lewa is qadar thi ghar ki tanhai ki bas

tujh se shikwa kya karen ab dil hi ko samjhaenge

tu to harjai hai aur phir aisa harjai ki bas

jab talak na-ashna tujh se the sab kuchh Thik tha

ek qayamat Dha gai teri shanasai ki bas

har qadam par sanglaKHon ka safar tha aur main

dasht-e-ulfat mein hui wo aabla-pai ki bas

khol hi deta tere sab raaz diwana tera

aastane se tere lekin sada aai ki bas

chaak kar Dala gareban main ne un ko dekh kar

ho gai meri sar-e-mahfil wo ruswai ki bas

yak-ba-yak wo ho gae 'bechain' sun kar mera nam

bole saudai hai mera aisa saudai ki bas