kal sin be-kal hai mera ji yar kun dekha na tha

kal siiñ be-kal hai mirā jī yaar kuuñ dekhā na thā

kyuuñ na hove betāb dil dildār kuuñ dekhā na thā

hai bajā gar hove ġhazal-ḳhvāñ misl-e-bulbul dil mirā

nau-bahār-e-gulshan-e-dīdār kuuñ dekhā na thā

kyūñki hove zāhid-e-ḳhud-bīñ murīd-e-zulf-e-yār

us ne saarī umr meñ zunnār kuuñ dekhā na thā

ab mushabbak ho gayā us tīr-e-mizhgāñ ke tufail

jis dil-e-nāzuk ne nok-e-ḳhār kuuñ dekhā na thā

abrū-e-pur-chīñ kuuñ tere dekh dil hairāñ huā

kyā magar shamshīr-e-jauhar-dār kuuñ dekhā na thā

sīna-e-guldār merā us kuuñ aayā hai pasand

yaar ne shāyad kabhī gulzār kuuñ dekhā na thā

dekh ashk-e-garm kuuñ mere kahā us ne 'sirāj'

maiñ kabhī is abr-e-ātish-bār kuuñ dekhā na thā

kal sin be-kal hai mera ji yar kun dekha na tha

kyun na howe betab dil dildar kun dekha na tha

hai baja gar howe ghazal-KHwan misl-e-bulbul dil mera

nau-bahaar-e-gulshan-e-didar kun dekha na tha

kyunki howe zahid-e-KHud-bin murid-e-zulf-e-yar

us ne sari umr mein zunnar kun dekha na tha

ab mushabbak ho gaya us tir-e-mizhgan ke tufail

jis dil-e-nazuk ne nok-e-KHar kun dekha na tha

abru-e-pur-chin kun tere dekh dil hairan hua

kya magar shamshir-e-jauhar-dar kun dekha na tha

sina-e-guldar mera us kun aaya hai pasand

yar ne shayad kabhi gulzar kun dekha na tha

dekh ashk-e-garm kun mere kaha us ne 'siraj'

main kabhi is abr-e-atish-bar kun dekha na tha