kal talak qane raha jo gardish-e-taqdir par

kal talak qaane rahā jo gardish-e-taqdīr par

musta.id hai aaj vo āfāq kī tasḳhīr pur

shor-o-ġhul meñ shahr ke us kī sadā bhī kho ga.ī

naaz thā jis ko ki apne nutq kī tāsīr par

jo bharī mahfil ke dil meñ raushnī phailā ga.ī

vo ḳhafā hai aaj tak merī isī taqrīr par

aur jab vo le sakā mujh se na koī intiqām

Daal dī ik ḳhaak kī muTThī mirī tasvīr par

apne hī jazbāt ke aage na kuchh us kī chale

vo jo qādir hai ḳhalāoñ kī kaThin tasḳhīr par

kyuuñ na duuñ maiñ dūsroñ ko ratjage kā mashvara

maiñ ki ḳhud nādim huuñ apne ḳhvāb kī ta.abīr par

jab se likkhā hai qasīda maiñ ne us kī shaan meñ

rashk sā aane lagā us ko mirī tahrīr par

āḳhirash vo zīnat-e-āġhosh-e-gum-nāmī huā

vo jo ḳhush hotā thā apnī khokhlī tash.hīr par

kis tarah 'betāb' us ne chhū liye barbat ke taar

haath jo rakhā huā thā qabza-e-shamshīr par

kal talak qane raha jo gardish-e-taqdir par

mustaid hai aaj wo aafaq ki tasKHir pur

shor-o-ghul mein shahr ke us ki sada bhi kho gai

naz tha jis ko ki apne nutq ki tasir par

jo bhari mahfil ke dil mein raushni phaila gai

wo KHafa hai aaj tak meri isi taqrir par

aur jab wo le saka mujh se na koi intiqam

Dal di ek KHak ki muTThi meri taswir par

apne hi jazbaat ke aage na kuchh us ki chale

wo jo qadir hai KHalaon ki kaThin tasKHir par

kyun na dun main dusron ko ratjage ka mashwara

main ki KHud nadim hun apne KHwab ki tabir par

jab se likkha hai qasida main ne us ki shan mein

rashk sa aane laga us ko meri tahrir par

aaKHirash wo zinat-e-aghosh-e-gum-nami hua

wo jo KHush hota tha apni khokhli tashhir par

kis tarah 'betab' us ne chhu liye barbat ke tar

hath jo rakha hua tha qabza-e-shamshir par