kal wo jo pa-e-shikar nikla

kal vo jo pa-e-shikār niklā

har dil ho umīd-vār niklā

jiine kī nahīñ umiid ham ko

tiir us kā jigar ke paar niklā

ham ḳhaak bhī ho ga.e par ab tak

dil se na tire ġhubār niklā

joñ baam pe be-naqāb ho kar

vo māh-ruḳh ek baar niklā

us roz muqābil us ke ḳhurshīd

niklā bhī to sharmsār niklā

ġham-ḳhvār ho kaun ab hamārā

jab tū hī na ġham-gusār niklā

the jis kī talāsh meñ ham ab tak

paas apne hī vo nigār niklā

har-chand meñ kī sarishk baarī

par dil se na ye buḳhār niklā

'bedār' hai ḳhair to ki shab ko

juuñ sham.a tū ashk-bār niklā

guzrā hai ḳhayāl kis kā jī meñ

aisā jo tū be-qarār niklā

kal wo jo pa-e-shikar nikla

har dil ho umid-war nikla

jine ki nahin umid hum ko

tir us ka jigar ke par nikla

hum KHak bhi ho gae par ab tak

dil se na tere ghubar nikla

jon baam pe be-naqab ho kar

wo mah-ruKH ek bar nikla

us roz muqabil us ke KHurshid

nikla bhi to sharmsar nikla

gham-KHwar ho kaun ab hamara

jab tu hi na gham-gusar nikla

the jis ki talash mein hum ab tak

pas apne hi wo nigar nikla

har-chand mein ki sarishk bari

par dil se na ye buKHar nikla

'bedar' hai KHair to ki shab ko

jun shama tu ashk-bar nikla

guzra hai KHayal kis ka ji mein

aisa jo tu be-qarar nikla