kal zarur aaoge lekin aaj kya karun

kal zarūr aaoge lekin aaj kyā karūñ

baḌh rahā hai qalb kā iḳhtilāj kyā karūñ

kyā karūñ koī nahīñ ehtiyāj dost ko

aur mujh ko dost kī ehtiyāj kyā karūñ

ab vo fikrmand haiñ kah diyā tabīb ne

ishq hai junūñ nahīñ maiñ ilaaj kyā karūñ

ġhairat-e-raqīb kā shikva kar rahe ho tum

is muāmle meñ saḳht hai mizāj kyā karūñ

mā-sivā-e-āshiqī aur kuchh kiyā bhī ho

sūjhtā hī kuchh nahīñ kām-kāj kyā karūñ

mahv-e-kār-e-deñ huuñ maiñ boriyā-nashīñ huuñ maiñ

rāhzan nahīñ huuñ maiñ taḳht-o-tāj kyā karūñ

zor aur zar baġhair ishq kyā karūñ 'hafīz'

chal gayā hai mulk meñ ye rivāj kyā karūñ

kal zarur aaoge lekin aaj kya karun

baDh raha hai qalb ka iKHtilaj kya karun

kya karun koi nahin ehtiyaj dost ko

aur mujh ko dost ki ehtiyaj kya karun

ab wo fikrmand hain kah diya tabib ne

ishq hai junun nahin main ilaj kya karun

ghairat-e-raqib ka shikwa kar rahe ho tum

is muamle mein saKHt hai mizaj kya karun

ma-siwa-e-ashiqi aur kuchh kiya bhi ho

sujhta hi kuchh nahin kaam-kaj kya karun

mahw-e-kar-e-den hun main boriya-nashin hun main

rahzan nahin hun main taKHt-o-taj kya karun

zor aur zar baghair ishq kya karun 'hafiz'

chal gaya hai mulk mein ye riwaj kya karun