kalam apna tabhi to aksar se muKHtalif hai

kalām apnā tabhī to aksar se muḳhtalif hai

jo sochte haiñ vo pesh-e-manzar se muḳhtalif hai

kahāñ se ham apnī gardishoñ kā javāz DhūñDeñ

hamārā mehvar zamīñ ke mehvar se muḳhtalif hai

isī liye to qubūliyat ke haiñ dar muqaffal

du'ā tumhārī mire muqaddar se muḳhtalif hai

tabhī to baiThe haiñ manzaroñ par jamā.e āñkheñ

jo un kā zāhir hai un ke andar se muḳhtalif hai

tarāshte haiñ jo āzarān-e-ḳhayāl aksar

vo ek paikar tumhāre paikar se muḳhtalif hai

'munīr' donoñ haiñ nīlgūñ vus'atoñ ke hāmil

magar samandar kā ḳhvāb ambar se muḳhtalif hai

kalam apna tabhi to aksar se muKHtalif hai

jo sochte hain wo pesh-e-manzar se muKHtalif hai

kahan se hum apni gardishon ka jawaz DhunDen

hamara mehwar zamin ke mehwar se muKHtalif hai

isi liye to qubuliyat ke hain dar muqaffal

du'a tumhaari mere muqaddar se muKHtalif hai

tabhi to baiThe hain manzaron par jamae aankhen

jo un ka zahir hai un ke andar se muKHtalif hai

tarashte hain jo aazaran-e-KHayal aksar

wo ek paikar tumhaare paikar se muKHtalif hai

'munir' donon hain nilgun wus'aton ke hamil

magar samandar ka KHwab ambar se muKHtalif hai