kaleja munh ko aata hai karen tum se bayan kyunkar

kaleja muñh ko aatā hai kareñ tum se bayāñ kyūñkar

na pūchho ham-safīro ham se chhūTā āshiyāñ kyūñkar

zarā dekheñ badal jaatā hai daur-e-āsmāñ kyūñkar

kisī ke haal par hotā hai koī mehrbāñ kyūñkar

hameñ to ġham se itnī bhī nahīñ fursat ki ye socheñ

mohabbat meñ huā kartā hai koī shādmāñ kyūñkar

kisī par umr bhar kī kis tarah mashq-e-sitam tum ne

zarā socho to dil meñ aur loge imtihāñ kyūñkar

chaman meñ ek muddat ham ne mashq-e-gul-fishānī kī

qafas tak aate aate aa ga.ī tarz-e-fuġhāñ kyūñkar

jo hālat dil kī hai vo rang-e-ruḳh uḌ uḌ ke kahtā hai

chhupā.eñ ham use bhī sūrat-e-dard-e-nihāñ kyūñkar

kaleje kī tarah jis ko jagah dī ham ne siine meñ

vahī dil ban gayā hai aaj un kā ham-zabāñ kyūñkar

kisī din aa ke āñkhoñ se zarā tum dekh to lete

kiyā kartā hai koī hijr meñ āh-o-fuġhāñ kyūñkar

kaleja munh ko aata hai karen tum se bayan kyunkar

na puchho ham-safiro hum se chhuTa aashiyan kyunkar

zara dekhen badal jata hai daur-e-asman kyunkar

kisi ke haal par hota hai koi mehrban kyunkar

hamein to gham se itni bhi nahin fursat ki ye sochen

mohabbat mein hua karta hai koi shadman kyunkar

kisi par umr bhar ki kis tarah mashq-e-sitam tum ne

zara socho to dil mein aur loge imtihan kyunkar

chaman mein ek muddat hum ne mashq-e-gul-fishani ki

qafas tak aate aate aa gai tarz-e-fughan kyunkar

jo haalat dil ki hai wo rang-e-ruKH uD uD ke kahta hai

chhupaen hum use bhi surat-e-dard-e-nihan kyunkar

kaleje ki tarah jis ko jagah di hum ne sine mein

wahi dil ban gaya hai aaj un ka ham-zaban kyunkar

kisi din aa ke aankhon se zara tum dekh to lete

kiya karta hai koi hijr mein aah-o-fughan kyunkar