kali jo gul ki chaTak rahi hai tabiat apni khaTak rahi hai

kalī jo gul kī chaTak rahī hai tabī.at apnī khaTak rahī hai

jahāñ meñ vahshat bhaTak rahī hai hazār sar ko paTak rahī hai

chaman meñ hai jo ki shāḳh-e-sumbul urūs-e-gul kī vo yā hai kākul

tujhe ḳhabar hai kuchh us kī bulbul jo us ke muñh par laTak rahī hai

vahāñ mujhe shauq-e-dil tū le jā jahāñ na sāġhar na ho.e miinā

ba-rañg-e-sāqī har ek baiThā sharāb-e-ḳhālis Tapak rahī hai

chaman meñ bulbul yahī pukārī lo mai-kashoñ kī phir aa.ī baarī

zabāñ pe shīshe ke hai ye jaarī sharāb lo yaañ Dhalak rahī hai

kahīñ pe majma.a hai mai-kashoñ kā kahīñ akhāḌā hai un butoñ kā

kahīñ barasnā hai bādaloñ kā kahīñ pe bijlī chamak rahī hai

mizha kī ulfat meñ zaar ban kar rahā huuñ mū-e-nigār ban kar

ye saañs siine meñ ḳhaar ban kar jigar ke andar khaTak rahī hai

na us meñ aa.ī zarā kudūrat guloñ kī mailī na siyāhat

sabā chaman meñ pa.e latāfat guloñ ke jaame chhiTak rahī hai

nahīñ bagūlā miyān-e-hāmūñ jo mujh se pūchho to saaf kah duuñ

talāsh-e-laila meñ rūh-e-majnūñ har ek jānib bhaTak rahī hai

ġhurūr-e-husn ai nigār kab tak chaman ke uupar bahār kab tak

rahoge zeb-e-kanār kab tak ḳhizāñ har ik gul ko tak rahī hai

jahāñ na bhaTTī na mai-kada hai ajab tarah kā magar samāñ hai

ḳhum-e-falak meñ ye kyā bharā hai sharāb-e-sāfī Tapak rahī hai

kahūñ maiñ fiqara vo hai hañsī kā charāġh-e-mahfil kā hai falītā

chhuTā jo shamla hai shaiḳh jī kā ye un kī sheḳhī laTak rahī hai

bahār laayā hai sāġhar-e-gul bhare haiñ goyā piyāla-e-mul

nahīñ hai mahfil meñ shor-e-qulqul chaman meñ bulbul chahak rahī hai

laḌā.ī kis ne hai aañkh uupar nigāh us kī hai misl-e-ḳhanjar

maiñ dekhtā huuñ ki chashm-e-aḳhtar falak ke uupar jhapak rahī hai

hamāre dil meñ nahīñ hai kiina ki jaise be-jurm ho nagīna

ye bahr-e-hastī kā hai safīna isī pe duniyā phaḌak rahī hai

bahār hai daur-e-mai-kashī kī guloñ kī rañgat abhī hai phīkī

ajiib hālat hai 'muntahī' kī abhī se chhātī dhaḌak rahī hai

kali jo gul ki chaTak rahi hai tabiat apni khaTak rahi hai

jahan mein wahshat bhaTak rahi hai hazar sar ko paTak rahi hai

chaman mein hai jo ki shaKH-e-sumbul urus-e-gul ki wo ya hai kakul

tujhe KHabar hai kuchh us ki bulbul jo us ke munh par laTak rahi hai

wahan mujhe shauq-e-dil tu le ja jahan na saghar na hoe mina

ba-rang-e-saqi har ek baiTha sharab-e-KHalis Tapak rahi hai

chaman mein bulbul yahi pukari lo mai-kashon ki phir aai bari

zaban pe shishe ke hai ye jari sharab lo yan Dhalak rahi hai

kahin pe majma hai mai-kashon ka kahin akhaDa hai un buton ka

kahin barasna hai baadalon ka kahin pe bijli chamak rahi hai

mizha ki ulfat mein zar ban kar raha hun mu-e-nigar ban kar

ye sans sine mein KHar ban kar jigar ke andar khaTak rahi hai

na us mein aai zara kudurat gulon ki maili na siyahat

saba chaman mein pae latafat gulon ke jame chhiTak rahi hai

nahin bagula miyan-e-hamun jo mujh se puchho to saf kah dun

talash-e-laila mein ruh-e-majnun har ek jaanib bhaTak rahi hai

ghurur-e-husn ai nigar kab tak chaman ke upar bahaar kab tak

rahoge zeb-e-kanar kab tak KHizan har ek gul ko tak rahi hai

jahan na bhaTTi na mai-kada hai ajab tarah ka magar saman hai

KHum-e-falak mein ye kya bhara hai sharab-e-safi Tapak rahi hai

kahun main fiqara wo hai hansi ka charagh-e-mahfil ka hai falita

chhuTa jo shamla hai shaiKH ji ka ye un ki sheKHi laTak rahi hai

bahaar laya hai saghar-e-gul bhare hain goya piyala-e-mul

nahin hai mahfil mein shor-e-qulqul chaman mein bulbul chahak rahi hai

laDai kis ne hai aankh upar nigah us ki hai misl-e-KHanjar

main dekhta hun ki chashm-e-aKHtar falak ke upar jhapak rahi hai

hamare dil mein nahin hai kina ki jaise be-jurm ho nagina

ye bahr-e-hasti ka hai safina isi pe duniya phaDak rahi hai

bahaar hai daur-e-mai-kashi ki gulon ki rangat abhi hai phiki

ajib haalat hai 'muntahi' ki abhi se chhati dhaDak rahi hai