kali ka rup chaman ko nikhaar hain hum log

kalī kā ruup chaman ko nikhār haiñ ham log

bahār ham se hai jān-e-bahār haiñ ham log

halāk-e-ranj haiñ ġham kā shikār haiñ ham log

zamāna biit gayā be-qarār haiñ ham log

shikār-e-gardish-e-lail-o-nahār kyā hote

harīf-e-gardish-e-lail-o-nahār haiñ ham log

koī kahe ġham-e-jānāñ ko kaise apnā.eñ

ki mubtalā-e-ġham-e-rozgār haiñ ham log

bisāt-e-dahr pe kuchh apnā iḳhtiyār nahīñ

ḳhudā gavāh ki be-iḳhtiyār haiñ ham log

uḌaa.e phirtī hai har-sū havā-e-dahr hameñ

havā ke saath misāl-e-ġhubār haiñ ham log

fazā-e-dasht meñ jaise ġhazāl āvāra

ravāñ ravāñ yūñhī dīvāna-vār haiñ ham log

agarche shahr bhī apnā hai mulk bhī apnā

'azīm' phir bhī ġharīb-ud-dayār haiñ ham log

kali ka rup chaman ko nikhaar hain hum log

bahaar hum se hai jaan-e-bahaar hain hum log

halak-e-ranj hain gham ka shikar hain hum log

zamana bit gaya be-qarar hain hum log

shikar-e-gardish-e-lail-o-nahaar kya hote

harif-e-gardish-e-lail-o-nahaar hain hum log

koi kahe gham-e-jaanan ko kaise apnaen

ki mubtala-e-gham-e-rozgar hain hum log

bisat-e-dahr pe kuchh apna iKHtiyar nahin

KHuda gawah ki be-iKHtiyar hain hum log

uDae phirti hai har-su hawa-e-dahr hamein

hawa ke sath misal-e-ghubar hain hum log

faza-e-dasht mein jaise ghazal aawara

rawan rawan yunhi diwana-war hain hum log

agarche shahr bhi apna hai mulk bhi apna

'azim' phir bhi gharib-ud-dayar hain hum log