kali kali ko diya baghban lahu humne

kalī kalī ko diyā bāġhbāñ lahū ham ne

kiyā hai tujh ko gulistāñ meñ surḳh-rū ham ne

ḳhudā ke vāste us be-vafā kā naam na lo

kiyā hai chāk-e-garebāñ abhī rafū ham ne

ḳhizāñ ke daaġh miTe kab guloñ ke dāman se

tujhe bhī dekh liyā mausam-e-numū ham ne

ḳhamosh rah ke tire tund-o-talḳh lahje par

badal diyā tirā andāz-e-guftugū ham ne

chaman kā rañg nikhartā hai jis ke partav se

bikher dī vo tajallī bhī chār-sū ham ne

samajh na paa.e vo ab tak qubūl-o-rad kaisā

ajiib rañg meñ kī sharh-e-ārzū ham ne

'nasīr' ḳhaam hai ab bhī ḳhayāl tauba kā

fuzūl toḌ diye sāġhar-o-subū ham ne

kali kali ko diya baghban lahu hum ne

kiya hai tujh ko gulistan mein surKH-ru hum ne

KHuda ke waste us be-wafa ka nam na lo

kiya hai chaak-e-gareban abhi rafu hum ne

KHizan ke dagh miTe kab gulon ke daman se

tujhe bhi dekh liya mausam-e-numu hum ne

KHamosh rah ke tere tund-o-talKH lahje par

badal diya tera andaz-e-guftugu hum ne

chaman ka rang nikharta hai jis ke partaw se

bikher di wo tajalli bhi chaar-su hum ne

samajh na pae wo ab tak qubul-o-rad kaisa

ajib rang mein ki sharh-e-arzu hum ne

'nasir' KHam hai ab bhi KHayal tauba ka

fuzul toD diye saghar-o-subu hum ne