کلی کھل اٹھتی ہے دل کی تمہارا نام آتے ہی

کلی کھل اٹھتی ہے دل کی تمہارا نام آتے ہی

تمہاری یاد میں کھو جاتی ہوں میں شام آتے ہی

بھلے کتنا ہی مرجھایا ہوا ہو میرا یہ چہرہ

بدل جاتی ہے رنگت ان کا اک پیغام آتے ہی

ہر اک الزام جن کے سر کا اپنے سر لیا میں نے

وہی منہ پھیر بیٹھے میرے سر الزام آتے ہی

ہمارا ٹھیک ہونا اب ہمیں ممکن نہیں لگتا

بگڑ اٹھتی ہے پھر حالت ذرا آرام آتے ہی

کرنؔ بے کار تو اس کے لیے آنسو بہاتی ہے

جو بالکل غیر بن جاتا ہے تیرا نام آتے ہی