kaliyon ka tabassum ho ki tum ho ki saba ho

kaliyoñ kā tabassum ho ki tum ho ki sabā ho

is raat ke sannāTe meñ koī to sadā ho

yuuñ jism mahaktā hai havā-e-gul-e-tar se

jaise koī pahlū se abhī uTh ke gayā ho

duniyā hama-tan-gosh hai āhista se bolo

kuchh aur qarīb aao koī sun na rahā ho

yuuñ raat ko hotā hai gumāñ dil kī sadā par

jaise koī dīvār se sar phoḌ rahā ho

yuuñ terī nigāhoñ meñ asar DhūñD rahā huuñ

jaise ki tujhe dil ke dhaḌakne kā pata ho

is darja mohabbat meñ taġhāful nahīñ achchhā

ham bhī jo kabhī tum se gurezāñ hoñ to kyā ho

ham ḳhaak ke zarroñ meñ haiñ 'aḳhtar' bhī guhar bhī

tum bām-e-falak se kabhī utro to patā ho

kaliyon ka tabassum ho ki tum ho ki saba ho

is raat ke sannaTe mein koi to sada ho

yun jism mahakta hai hawa-e-gul-e-tar se

jaise koi pahlu se abhi uTh ke gaya ho

duniya hama-tan-gosh hai aahista se bolo

kuchh aur qarib aao koi sun na raha ho

yun raat ko hota hai guman dil ki sada par

jaise koi diwar se sar phoD raha ho

yun teri nigahon mein asar DhunD raha hun

jaise ki tujhe dil ke dhaDakne ka pata ho

is darja mohabbat mein taghaful nahin achchha

hum bhi jo kabhi tum se gurezan hon to kya ho

hum KHak ke zarron mein hain 'aKHtar' bhi guhar bhi

tum baam-e-falak se kabhi utro to pata ho