کلیوں کو ہنسی آ جاتی ہے پھولوں پہ نکھار آ جاتا ہے

کلیوں کو ہنسی آ جاتی ہے پھولوں پہ نکھار آ جاتا ہے

تقدیر چمن جاگ اٹھتی ہے جب جان بہار آ جاتا ہے

پی لیتے ہیں خود اپنے آنسو گھٹ جاتا ہے ان کے تن کا لہو

صیاد اسیروں کے آگے جب ذکر بہار آ جاتا ہے

تنہا ہے تو اس کی فکر نہ کر ہو راہ طلب میں گرم سفر

عشاق کا دل بہلانے کو منزل کا غبار آ جاتا ہے

آیا جو عنادل پر نہ ترس بے جرم کیا پابند قفس

صیاد عبث اب ہمدردی کیا جا کے وقار آ جاتا ہے

ان کو ہوں مبارک میخانے جو صرف ہیں مے کے دیوانے

مجھ تک تو خیال ساقی ہی مستی بکنار آ جاتا ہے

زاہد تو ہمارے عصیاں پر یوں طنز نہ کر مایوس نہ کر

جب اشک ندامت بہتے ہیں رحمت کو بھی پیار آ جاتا ہے