kam gham-e-motabar na ho jae

kam ġham-e-mo'tabar na ho jaa.e

zindagī muḳhtasar na ho jaa.e

koī jaatā hai paas se uTh kar

har nafas talḳh-tar na ho jaa.e

aah karte hue bhī Dartā huuñ

be-ḳhabar ko ḳhabar na ho jaa.e

uf ye un ke shabāb kā 'ālam

aa.ine ko ḳhabar na ho jaa.e

ik ḳhalish sī abhī jo dil meñ hai

soz-e-qalb-o-jigar na ho jaa.e

mauj-e-gul hai junūñ-navāz bahut

phir ḳhirad muntashar na ho jaa.e

hāsil-e-bandagī kahīñ 'naġhmī'

sajda-e-sang-e-dar na ho jaa.e

kam gham-e-mo'tabar na ho jae

zindagi muKHtasar na ho jae

koi jata hai pas se uTh kar

har nafas talKH-tar na ho jae

aah karte hue bhi Darta hun

be-KHabar ko KHabar na ho jae

uf ye un ke shabab ka 'alam

aaine ko KHabar na ho jae

ek KHalish si abhi jo dil mein hai

soz-e-qalb-o-jigar na ho jae

mauj-e-gul hai junun-nawaz bahut

phir KHirad muntashar na ho jae

hasil-e-bandagi kahin 'naghmi'

sajda-e-sang-e-dar na ho jae