kam-KHwab the auron ko jagate hue guzre

kam-ḳhvāb the auroñ ko jagāte hue guzre

ham vaqt-e-sahar Dhol bajāte hue guzre

ik jāda-e-pur-ḳhār thī dushvār thī duniyā

ushshāq magar jhūmte gaate hue guzre

har nāz-e-sabā rashk-e-chaman husn-e-mujassam

pathrā.e agar aañkh milāte hue guzre

ik ziist kī vaadī thī magar yaad nahīñ hai

aate hue guzre the ki jaate hue guzre

pahle kiyā taḳhlīq use aag se ham ne

phir ham hī use haath lagāte hue guzre

sur-tāl ko ashkāl ko alfāz meñ Dhālā

imkān ko imkān banāte hue guzre

vo jān-e-suḳhan gosh-bar-āvāz nahīñ thā

dīvār ko ash.ār sunāte hue guzre

kuchh ḳhūgar-e-duniyā to kisī ko ġham-e-yazdāñ

darvesh magar haath chhuḌāte hue guzre

sharminda-e-vus.at haiñ zamīneñ bhī ḳhalā bhī

dar dasht-o-daman ḳhaak uḌāte hue guzre

muñh rakh ke tire muñh pe tujhe saañs pilā.ī

ham jaañ se tirī jaan bachāte hue guzre

ham bhuul bhī jaa.eñ to hameñ DhūñD sake tū

raste meñ tire phuul girāte hue guzre

is chashm-e-namak-bār kī vīrān galī se

bārish meñ lagātār nahāte hue guzre

logoñ ne kiyā daur-e-junūñ ġharq-e-ibādat

'ākāsh' miyāñ khelte khāte hue guzre

kam-KHwab the auron ko jagate hue guzre

hum waqt-e-sahar Dhol bajate hue guzre

ek jada-e-pur-KHar thi dushwar thi duniya

ushshaq magar jhumte gate hue guzre

har naz-e-saba rashk-e-chaman husn-e-mujassam

pathrae agar aankh milate hue guzre

ek zist ki wadi thi magar yaad nahin hai

aate hue guzre the ki jate hue guzre

pahle kiya taKHliq use aag se hum ne

phir hum hi use hath lagate hue guzre

sur-tal ko ashkal ko alfaz mein Dhaala

imkan ko imkan banate hue guzre

wo jaan-e-suKHan gosh-bar-awaz nahin tha

diwar ko ashaar sunate hue guzre

kuchh KHugar-e-duniya to kisi ko gham-e-yazdan

darwesh magar hath chhuDate hue guzre

sharminda-e-wusat hain zaminen bhi KHala bhi

dar dasht-o-daman KHak uDate hue guzre

munh rakh ke tere munh pe tujhe sans pilai

hum jaan se teri jaan bachate hue guzre

hum bhul bhi jaen to hamein DhunD sake tu

raste mein tere phul giraate hue guzre

is chashm-e-namak-bar ki viran gali se

barish mein lagatar nahate hue guzre

logon ne kiya daur-e-junun gharq-e-ibaadat

'akash' miyan khelte khate hue guzre