کم میسر ہو جو ہوتی ہے اسی کی قیمت

کم میسر ہو جو ہوتی ہے اسی کی قیمت

کثرت غم نے بڑھائی ہے خوشی کی قیمت

پیرویٔ دل ناداں کا سلیقہ ہے جنہیں

ان سے پوچھے کوئی بے راہروی کی قیمت

تم نے ہنستے مجھے دیکھا ہے تمہیں کیا معلوم

کرنی پڑتی ہے ادا کتنی ہنسی کی قیمت

احترام اپنا ہی خود جس کی نگاہوں میں نہ ہو

کیا بھلا اس کی نگاہوں میں کسی کی قیمت

مجھ سے دھوکا تو ہوا دل کو مگر موج سراب

مل گئی مجھ کو مری تشنہ لبی کی قیمت

میرے سینے میں چھپے زخم بتائیں گے رئیسؔ

میں نے جو کی ہے ادا زندہ دلی کی قیمت