kam se kam itni udhaari chahiye

kam se kam itnī udhārī chāhiye

dil meñ phir se be-qarārī chāhiye

niiñd vaise bhī nahīñ aatī magar

āñkhoñ meñ do pal ḳhumārī chāhiye

har jagah mā'sūmiyat achchhī nahīñ

ab hameñ bhī hoshiyārī chāhiye

zindagī kī raah tanhā kaT rahī

saath chalne ko savārī chāhiye

bhuul jaanā to alag ik baat hai

kuchh na kuchh to yādgārī chāhiye

ye na.ī shohrat nahīñ jachtī hameñ

vo purānī ḳhāksārī chāhiye

phuul kaliyoñ se chaman ābād hai

bāġhbāñ ko phir bhī aarī chāhiye

jo kaho har baat bāhar jā rahī

kuchh tumheñ bhī rāzdārī chāhiye

jokaroñ kī bhiiḌ baḌhtī jā rahī

ab 'abhay' qābil madārī chāhiye

kam se kam itni udhaari chahiye

dil mein phir se be-qarari chahiye

nind waise bhi nahin aati magar

aankhon mein do pal KHumari chahiye

har jagah ma'sumiyat achchhi nahin

ab hamein bhi hoshiyari chahiye

zindagi ki rah tanha kaT rahi

sath chalne ko sawari chahiye

bhul jaana to alag ek baat hai

kuchh na kuchh to yaadgari chahiye

ye nai shohrat nahin jachti hamein

wo purani KHaksari chahiye

phul kaliyon se chaman aabaad hai

baghban ko phir bhi aari chahiye

jo kaho har baat bahar ja rahi

kuchh tumhein bhi raazdari chahiye

jokaron ki bhiD baDhti ja rahi

ab 'abhay' qabil madari chahiye