kam sitam karne mein qatil se nahin dil mera

kam sitam karne meñ qātil se nahīñ dil merā

mere pahlū meñ chhupā baiThā hai qātil merā

vasl meñ yuuñ mire pahlū ko na pahlū se dabā

TuuT jaa.e na kahīñ ābla-e-dil merā

qatl hone na diyā us kī nazākat ne mujhe

rah gayā apnā sā muñh le ke vo qātil merā

un ko nashsha hai maiñ be-ḳhud huuñ yahī Dar hai mujhe

vo kahīñ haal na pūchheñ sar-e-mahfil merā

hichkiyāñ aa.iiñ dam-e-naza.a to qātil ne kahā

ab to letā hai maze maut ke bismil merā

vaqt-e-āḳhir koī rotā hai lipaT ke mujh se

ye ināyat hai to marnā bhī hai mushkil merā

dekhnā koī sar-e-arsh se taarā TuuTā

yā hasīñ aañkh se zālim kī girā dil merā

dast-basta ye kaho hazrat-e-'sāhir' se 'vasīm'

aap chāheñ to khule uqda-e-mushkil merā

kam sitam karne mein qatil se nahin dil mera

mere pahlu mein chhupa baiTha hai qatil mera

wasl mein yun mere pahlu ko na pahlu se daba

TuT jae na kahin aabla-e-dil mera

qatl hone na diya us ki nazakat ne mujhe

rah gaya apna sa munh le ke wo qatil mera

un ko nashsha hai main be-KHud hun yahi Dar hai mujhe

wo kahin haal na puchhen sar-e-mahfil mera

hichkiyan aain dam-e-naza to qatil ne kaha

ab to leta hai maze maut ke bismil mera

waqt-e-aKHir koi rota hai lipaT ke mujh se

ye inayat hai to marna bhi hai mushkil mera

dekhna koi sar-e-arsh se tara TuTa

ya hasin aankh se zalim ki gira dil mera

dast-basta ye kaho hazrat-e-'sahir' se 'wasim'

aap chahen to khule uqda-e-mushkil mera