کم سخن میں ہوں آپ کم آمیز

کم سخن میں ہوں آپ کم آمیز

دل کا پیمانہ غم سے ہے لبریز

بھیگی پلکوں سے خوں ٹپکنے لگا

دامن دل جو ہو گیا خوں ریز

لڑکھڑاتے ہیں موت کے بھی قدم

نشۂ زندگی ہے کتنا تیز

رک گئے قافلے بہاروں کے

کس کے نالے ہیں اتنے دردانگیز

لب پہ ہے طنز بھی تبسم بھی

ہر ادا ان کی مصلحت آمیز

دل کی ویرانیوں کا کیا ہوگا

زندگی تو بھی ہے نشاط انگیز

ضبط غم اک تری نوازش سے

دامن آرزو ہوا خوں ریز

ساری دنیا کو بھول بیٹھا ہوں

تیری یادیں ہیں کتنی دل آویز

جگمگایا دیار دل نیرؔ

جب بھی کوئی ہوا تبسم ریز