kamal-e-husn ka jis se tumhein KHazana mila

kamāl-e-husn kā jis se tumheñ ḳhazāna milā

mujhe isī se ye andāz-e-āshiqāna milā

jabīn-e-shauq ko āsūdgī nasīb huī

sar-e-niyāz ko jab terā āstāna milā

tamām umr sahāroñ kī justujū meñ rahā

vo bad-nasīb jise terā aasrā na milā

kamī na thī mirī duniyā meñ āshnāoñ kī

sitam to ye hai koī dard-āshnā na milā

sanam-kadoñ meñ to asnām jalva-farmā the

ḳhudā ke ghar meñ bhī mujh ko kahīñ ḳhudā na milā

tumheñ to apnī jafāoñ kī ḳhuub daad milī

mirī vafāoñ kā mujh ko koī sila na milā

chaman meñ rah ke bhī 'ātish' ḳhizāñ-nasīboñ ko

kabhī bahār kā paiġhām-e-jāñ-fazā na milā

kamal-e-husn ka jis se tumhein KHazana mila

mujhe isi se ye andaz-e-ashiqana mila

jabin-e-shauq ko aasudgi nasib hui

sar-e-niyaz ko jab tera aastana mila

tamam umr sahaaron ki justuju mein raha

wo bad-nasib jise tera aasra na mila

kami na thi meri duniya mein aashnaon ki

sitam to ye hai koi dard-ashna na mila

sanam-kadon mein to asnam jalwa-farma the

KHuda ke ghar mein bhi mujh ko kahin KHuda na mila

tumhein to apni jafaon ki KHub dad mili

meri wafaon ka mujh ko koi sila na mila

chaman mein rah ke bhi 'atish' KHizan-nasibon ko

kabhi bahaar ka paigham-e-jaan-faza na mila