کمال عشق میں جذب و اثر کی بات نہ کر

کمال عشق میں جذب و اثر کی بات نہ کر

انہیں کی راہ میں کھو جا خبر کی بات نہ کر

تری تلاش میں منزل کی کوئی قید نہیں

حرم کی دیر کی دیوار و در کی بات نہ کر

کلیم دیکھ چکے حسن یار کے جلوے

یہ ان کا بخت ہے ذوق نظر کی بات نہ کر

مہک مہک اٹھیں گلیاں جو کھل گئے گیسو

ریاض حضرت خیر البشر کی بات نہ کر

شعور اسی کا تو عرش بریں کی زینت ہے

فقط رسائیٔ پائے بشر کی بات نہ کر

طلوع ماہ عرب سے ہیں دو جہاں روشن

ضیا فروزیٔ شمس و قمر کی بات نہ کر

چمن بدوش ہے ہر ذرہ ارض طیبہ کا

بہار گلشن گلہائے تر کی بات نہ کر

بہار مصحف‌ ناطق کے دیکھنے والے

ارم کی دہر کی برگ و شجر کی بات نہ کر

ہمارے اشک ندامت کا کوئی مول کہاں

یہ نذر نقد ہے لعل و گہر کی بات نہ کر

جہاں میں چار سو پھیلا ہوا ہے بغض و عناد

اندھیری رات میں نور سحر کی بات نہ کر

شفیعؔ امید ہے بخشائیں گے وہی مجھ کو

بجز عطائے شہہ بحر و بر کی بات نہ کر