kamal-e-ishq mein soz-e-nihan baqi nahin rahta

kamāl-e-ishq meñ soz-e-nihāñ baaqī nahīñ rahtā

bhaḌak jaate haiñ jab sho'le dhuāñ baaqī nahīñ rahtā

jabīñ to phir jabīñ hai āstāñ baaqī nahīñ rahtā

jahāñ tum ho kisī kā bhī nishāñ baaqī nahīñ rahtā

tumheñ dekhūñ to kyā dekhūñ tumheñ samjhūñ ko kyā samjhūñ

mohabbat meñ to apnā bhī gumāñ baaqī nahīñ rahtā

unhīñ se pūchhiye ye un ke dil par kyā guzartī hai

bahāroñ meñ bhī jin kā āshiyāñ baaqī nahīñ rahtā

kabhī yaad un kī aa.ī hai kabhī vo ḳhud bhī aate haiñ

mohabbat meñ hijāb-e-darmiyāñ baaqī nahīñ rahtā

mohabbat raas aatī hai to chhā jaatī hai duniyā par

bigaḌtī hai to phir nām-o-nishāñ baaqī nahīñ rahtā

ḳhizāñ meñ lāla-o-gul kā bharam bhī khul hī jaatā hai

hamesha to fareb-e-gulsitāñ baaqī nahīñ rahtā

usī manzil meñ aate haiñ kahīñ dair-o-haram 'ārif'

harīm-e-dil se bach kar āstāñ baaqī nahīñ rahtā

kamal-e-ishq mein soz-e-nihan baqi nahin rahta

bhaDak jate hain jab sho'le dhuan baqi nahin rahta

jabin to phir jabin hai aastan baqi nahin rahta

jahan tum ho kisi ka bhi nishan baqi nahin rahta

tumhein dekhun to kya dekhun tumhein samjhun ko kya samjhun

mohabbat mein to apna bhi guman baqi nahin rahta

unhin se puchhiye ye un ke dil par kya guzarti hai

bahaaron mein bhi jin ka aashiyan baqi nahin rahta

kabhi yaad un ki aai hai kabhi wo KHud bhi aate hain

mohabbat mein hijab-e-darmiyan baqi nahin rahta

mohabbat ras aati hai to chha jati hai duniya par

bigaDti hai to phir nam-o-nishan baqi nahin rahta

KHizan mein lala-o-gul ka bharam bhi khul hi jata hai

hamesha to fareb-e-gulsitan baqi nahin rahta

usi manzil mein aate hain kahin dair-o-haram 'arif'

harim-e-dil se bach kar aastan baqi nahin rahta