kamal-e-tishnagi ki intiha hun

kamāl-e-tishnagī kī intihā huuñ

samundar huuñ magar pyāsā rahā huuñ

ba-īñ-barbādī-o-bā-sad ḳharābī

tirā ai zindagī naġhma-sarā huuñ

tujhe kyuuñ is qadar chāhā thā maiñ ne

tujhe kyuuñ bhuul jaanā chāhtā huuñ

badalte mausamoñ se jā ke pūchho

maiñ gul huuñ ḳhaar huuñ ġhuncha huuñ kyā huuñ

zamāne dekh merī kaj-kulāhī

jahāñ thā maiñ vahīñ ab bhī khaḌā huuñ

mahak uThte haiñ yādoñ ke darīche

tire baare meñ jab bhī sochtā huuñ

unhīñ rāhoñ pe chalnā kyā zarūrī

ki jin ko rauñd kar maiñ jā chukā huuñ

kamal-e-tishnagi ki intiha hun

samundar hun magar pyasa raha hun

ba-in-barbaadi-o-ba-sad KHarabi

tera ai zindagi naghma-sara hun

tujhe kyun is qadar chaha tha main ne

tujhe kyun bhul jaana chahta hun

badalte mausamon se ja ke puchho

main gul hun KHar hun ghuncha hun kya hun

zamane dekh meri kaj-kulahi

jahan tha main wahin ab bhi khaDa hun

mahak uThte hain yaadon ke dariche

tere bare mein jab bhi sochta hun

unhin rahon pe chalna kya zaruri

ki jin ko raund kar main ja chuka hun