کمی کیا رہ گئی تھی قربتوں میں

کمی کیا رہ گئی تھی قربتوں میں

سمجھ آنے لگے گا فاصلوں میں

مرے بارے میں جب بھی بات ہوگی

تمہارا ذکر ہوگا حادثوں میں

ہمیں سورج کا کچھ کرنا پڑے گا

یہ چرچا چل رہی ہے جگنوؤں میں

مجھے کچھ دن سے ایسا لگ رہا ہے

کوئی دشمن ہے میرے دوستوں میں

کسی پچھلے جنم کا پنیہ ہے یہ

کہ ہم بیٹھے ہوئے ہیں شاعروں میں

وہ ہے گمنام بازی جیت کر بھی

ہماری ہار بھی ہے سرخیوں میں

محبت راس آتی ہے انہیں کو

مزہ آتا ہے جن کو مشکلوں میں