kamzor da’wedar ne ruswa bahut kiya

kamzor dā’vedār ne rusvā bahut kiyā

ham ko hamārī haar ne rusvā bahut kiyā

har samt tere chāhne vāloñ kī bhiiḌ thī

Thahrī huī qatār ne rusvā bahut kiyā

rusvā.iyoñ ke aur marāhil bhī the magar

kambaḳht intizār ne rusvā bahut kiyā

daur-e-visāl yuuñ na guzartā ḳhizāñ ke biich

is nak-chaḌhī bahār ne rusvā bahut kiyā

saare fasād kī to yahī āḳhirī thī jaḌ

insāñ ko e'tibār ne rusvā bahut kiyā

maazī kī un tamām chahal-qadmiyoñ kī ḳhair

is baar terī car ne rusvā bahut kiyā

maflūj ho ga.ī hai mire sochne kī his

shāyad tumhāre pyaar ne rusvā bahut kiyā

kamzor da’wedar ne ruswa bahut kiya

hum ko hamari haar ne ruswa bahut kiya

har samt tere chahne walon ki bhiD thi

Thahri hui qatar ne ruswa bahut kiya

ruswaiyon ke aur marahil bhi the magar

kambaKHt intizar ne ruswa bahut kiya

daur-e-visal yun na guzarta KHizan ke bich

is nak-chaDhi bahaar ne ruswa bahut kiya

sare fasad ki to yahi aaKHiri thi jaD

insan ko e'tibar ne ruswa bahut kiya

mazi ki un tamam chahal-qadmiyon ki KHair

is bar teri car ne ruswa bahut kiya

mafluj ho gai hai mere sochne ki his

shayad tumhaare pyar ne ruswa bahut kiya