kar chuke barbaad dil ko fikr kya anjam ki

kar chuke barbād dil ko fikr kyā anjām kī

ab hameñ de do ye miTTī hai hamāre kaam kī

Duub de de bāda-e-gul-rañg meñ zāhid agar

dekhiye rañgīniyāñ phir jāma-e-ehrām kī

aks-e-abrū dekhte haiñ bāda-e-sar-josh meñ

iid hai sāqī-parastoñ meñ hilāl-e-jām kī

ibtidā-e-ishq hai aur bujh rahā hai dil mirā

ho chalī dhīmī abhī se lau charāġh-e-shām kī

aañkh meñ aañsū haiñ māthe par araq hai maut kā

le ḳhabar umr-e-ravāñ apne chhalakte jaam kī

ho ga.ī bāzīcha-e-atfāl be-zauq-o-shu.ūr

shā.irī jo thī murādif ma.anī-e-ilhām kī

puḳhtagī samjhe hue haiñ jo tanāsub ko faqat

chāhiye islāh un ko is ḳhayāl-e-ḳhām kī

hai ye nāzuk fan jo shāyān-e-tahī-maġhzī nahīñ

daur-e-majlis meñ zarūrat kyā hai ḳhālī jaam kī

hai 'azīz' ā.īna-e-lafzī murā.ātun-nazīr

husn-e-ma.anī jab nahīñ phir shā.irī kis kaam kī

kar chuke barbaad dil ko fikr kya anjam ki

ab hamein de do ye miTTi hai hamare kaam ki

Dub de de baada-e-gul-rang mein zahid agar

dekhiye ranginiyan phir jama-e-ehram ki

aks-e-abru dekhte hain baada-e-sar-josh mein

id hai saqi-paraston mein hilal-e-jam ki

ibtida-e-ishq hai aur bujh raha hai dil mera

ho chali dhimi abhi se lau charagh-e-sham ki

aankh mein aansu hain mathe par araq hai maut ka

le KHabar umr-e-rawan apne chhalakte jam ki

ho gai bazicha-e-atfal be-zauq-o-shuur

shairi jo thi muradif mani-e-ilham ki

puKHtagi samjhe hue hain jo tanasub ko faqat

chahiye islah un ko is KHayal-e-KHam ki

hai ye nazuk fan jo shayan-e-tahi-maghzi nahin

daur-e-majlis mein zarurat kya hai KHali jam ki

hai 'aziz' aaina-e-lafzi muraatun-nazir

husn-e-mani jab nahin phir shairi kis kaam ki