کر دے مجھ کو میرے کاموں میں خدایا کامیاب

کر دے مجھ کو میرے کاموں میں خدایا کامیاب

میں قدم جس میں رکھوں ہو عزم میرا کامیاب

دیکھ کر دشمن مرے حیران ہیں ہر کام کو

رشک ان کا بڑھ گیا مجھ کو جو دیکھا کامیاب

دیکھ کر اقبال میرا ہنس کے کہتے ہیں یہ دوست

دل ہمارا کیوں نا خوش ہو جب ہو صغریٰؔ کامیاب

دیکھ کر دنیا کی حالت دل یہ کہتا ہے میرا

ہیں یہ سب ناکام ہم ہیں ایک تنہا کامیاب

آئیں گے شاہ دکن کے جب مرے گھر میں قدم

میں سمجھ لوں گی ہوا قسمت کا لکھا کامیاب

دیکھ کر میں شاہ کو کیا نذر دوں حیران ہوں

اک قلم ہے ہاتھ میں جس نے بنایا کامیاب

میں نے رکھا ہے بھروسہ اک خدا کی ذات پر

اس نے اپنے فضل سے مجھ کو بنایا کامیاب

ہے یہ میری آرزو جاؤں مدینے کو کبھی

ہے یقیں مجھ کو کریں گے میرے مولا کامیاب

میرے آقا میرے ہادی میرے رہبر ہیں علی

مشکلیں آسان کر دیں اور بنایا کامیاب