kar diya zar gham-e-ishq ne aisa mujhko

kar diyā zaar ġham-e-ishq ne aisā mujh ko

maut aa.ī bhī to bistar pe na paayā mujh ko

kabhī jañgal kabhī bastī meñ phirāyā mujh ko

aah kyā kyā na kiyā ishq ne rusvā mujh ko

dushman-e-jāñ huā dar-parda mirā jazba-e-ishq

muñh chhupāne lage vo jaan ke shaidā mujh ko

roz-e-raushan ho na kyūñkar mirī āñkhoñ meñ siyāh

hai tire gesū-e-shab-rañg kā saudā mujh ko

ik parī-rū kī mohabbat kā maiñ huuñ dīvāna

na parī kā na kisī jin kā hai saaya mujh ko

roz-o-shab shoḳh ne kyā kyā na dikhā.e nairañg

ruḳh dikhāyā kabhī gesū-e-chalīpā mujh ko

din bhale aa.e to a.adā sabab-e-ḳhair hue

bad-duā ne kiyā aġhyār kī achchhā mujh ko

faḳhr se bazm-e-butāñ meñ vo kahā karte haiñ

pyaar kuchh roz se ab karte haiñ 'ra.anā' mujh ko

kar diya zar gham-e-ishq ne aisa mujh ko

maut aai bhi to bistar pe na paya mujh ko

kabhi jangal kabhi basti mein phiraya mujh ko

aah kya kya na kiya ishq ne ruswa mujh ko

dushman-e-jaan hua dar-parda mera jazba-e-ishq

munh chhupane lage wo jaan ke shaida mujh ko

roz-e-raushan ho na kyunkar meri aankhon mein siyah

hai tere gesu-e-shab-rang ka sauda mujh ko

ek pari-ru ki mohabbat ka main hun diwana

na pari ka na kisi jin ka hai saya mujh ko

roz-o-shab shoKH ne kya kya na dikhae nairang

ruKH dikhaya kabhi gesu-e-chalipa mujh ko

din bhale aae to aada sabab-e-KHair hue

bad-dua ne kiya aghyar ki achchha mujh ko

faKHr se bazm-e-butan mein wo kaha karte hain

pyar kuchh roz se ab karte hain 'rana' mujh ko