kar gae ashk meri aankh ko jal-thal kya kya

kar ga.e ashk mirī aañkh ko jal-thal kyā kyā

ab ke barsā hai tirī yaad kā bādal kyā kyā

jis taraf dekhiye ik qaus-e-quzah hai raqsāñ

rañg bhartā hai fazā meñ tirā āñchal kyā kyā

tū to chup-chāp thā lekin tujhe ma.alūm nahīñ

kah gayā merī nazar se tirā kājal kyā kyā

shahr-e-saffāk kī be-dard guzargāhoñ meñ

jagmagāte haiñ charāġh-e-sar-e-maqtal kyā kyā

kis liye jaa.eñ bhalā dasht ko ham dīvāne

shahr hī bante chale jaate haiñ jañgal kyā kyā

ab bhī har moḌ pe ik tishna-labī hai 'betāb'

yuuñ to is shahr pe barsā kiye bādal kyā kiyā

kar gae ashk meri aankh ko jal-thal kya kya

ab ke barsa hai teri yaad ka baadal kya kya

jis taraf dekhiye ek qaus-e-quzah hai raqsan

rang bharta hai faza mein tera aanchal kya kya

tu to chup-chap tha lekin tujhe malum nahin

kah gaya meri nazar se tera kajal kya kya

shahr-e-saffak ki be-dard guzargahon mein

jagmagate hain charagh-e-sar-e-maqtal kya kya

kis liye jaen bhala dasht ko hum diwane

shahr hi bante chale jate hain jangal kya kya

ab bhi har moD pe ek tishna-labi hai 'betab'

yun to is shahr pe barsa kiye baadal kya kiya