kar gai gul-tab rangon ki farawani hamein

kar ga.ī gul-tāb rañgoñ kī farāvānī hameñ

nuur sā rañg de gayā shauq-e-ġhazal-rānī hameñ

dāman-e-dil be-zamīrī se bachā paa.e na ham

lag gayā āḳhir ko shahr-e-ġhair kā paanī hameñ

muft meñ baiThe biThā.e saarī duniyā dekh lī

mil na paa.ī thī kabhī aisī tan-āsānī hameñ

ḳhud-pasandī dekhī terī ḳhud-sarī bhī dekh lī

aur kyā dikhlā.egā ai dushman-e-jānī hameñ

terī marzī ho to chakh leñ apnī marzī kā maza

zindagī kar lene de thoḌī sī man-mānī hameñ

zindagī par band ho kar rah ga.e haiñ rāste

kis jagah le aa.ī hai is dil kī man-mānī hameñ

bāvajūd is ke parāyoñ ke na dil ThanDe hue

be-tarah mahñgī paḌī apnoñ kī qurbānī hameñ

yuuñ to ghar vaale bulāyā karte haiñ abdul-hasīb

vaise duniyā kahtī hai 'parvez'-rahmānī hameñ

kar gai gul-tab rangon ki farawani hamein

nur sa rang de gaya shauq-e-ghazal-rani hamein

daman-e-dil be-zamiri se bacha pae na hum

lag gaya aaKHir ko shahr-e-ghair ka pani hamein

muft mein baiThe biThae sari duniya dekh li

mil na pai thi kabhi aisi tan-asani hamein

KHud-pasandi dekhi teri KHud-sari bhi dekh li

aur kya dikhlaega ai dushman-e-jaani hamein

teri marzi ho to chakh len apni marzi ka maza

zindagi kar lene de thoDi si man-mani hamein

zindagi par band ho kar rah gae hain raste

kis jagah le aai hai is dil ki man-mani hamein

bawajud is ke parayon ke na dil ThanDe hue

be-tarah mahngi paDi apnon ki qurbani hamein

yun to ghar wale bulaya karte hain abdul-hasib

waise duniya kahti hai 'parwez'-rahmani hamein