kar gaya gosha-nashinon pe ye ehsan koi

kar gayā gosha-nashīnoñ pe ye ehsāñ koī

de gayā mashġhala-e-chāk-garebāñ koī

hai yahī shauq kī pastī-o-bulandī kā mizāj

farsh kī gard koī arsh kā mehmāñ koī

zo.af-o-himmat ke karishme haiñ che mumkin che muhāl

kaam mushkil hai koī aur na āsāñ koī

aaj vo din hai ki raushan hai shabistān-e-ḳhayāl

rok de baḌh ke zarā gardish-e-daurāñ koī

zulf-o-kākul kā fasāna ho kisī tarah darāz

is ḳham-o-pech meñ hai silsila-jumbāñ koī

aur bhī zaḳhm haiñ ai chāk-e-garebān-e-junūñ

tū hañse yā na hañse hogā numāyāñ koī

aise sahrā meñ jahāñ naḳhl kā saaya bhī na thā

baḌh gayā chhoḌ ke tanhā hameñ 'ehsāñ' koī

kar gaya gosha-nashinon pe ye ehsan koi

de gaya mashghala-e-chaak-gareban koi

hai yahi shauq ki pasti-o-bulandi ka mizaj

farsh ki gard koi arsh ka mehman koi

zoaf-o-himmat ke karishme hain che mumkin che muhaal

kaam mushkil hai koi aur na aasan koi

aaj wo din hai ki raushan hai shabistan-e-KHayal

rok de baDh ke zara gardish-e-dauran koi

zulf-o-kakul ka fasana ho kisi tarah daraaz

is KHam-o-pech mein hai silsila-jumban koi

aur bhi zaKHm hain ai chaak-e-gareban-e-junun

tu hanse ya na hanse hoga numayan koi

aise sahra mein jahan naKHl ka saya bhi na tha

baDh gaya chhoD ke tanha hamein 'ehsan' koi