kar gaya kya koi intiqal aadmi

kar gayā kyā koī intiqāl aadmī

log kahte haiñ thā bā-kamāl aadmī

apnī rif.at pe ḳhud hī hai daal aadmī

shaan ye hai ki hai be-misāl aadmī

baiTh jā.egā thak-hār kar ek din

aur kuchh din karegā dhamāl aadmī

sar pe hotī nahīñ jab ḳhushī key ridā

oḌh letā hai kitne malāl aadmī

karte karte savālāt hal jism ke

ban gayā aaj ḳhud hī savāl aadmī

duur kaisā hai aayā kahāñ DhūñDiye

ab to milte nahīñ ḳhush-ḳhisāl aadmī

aish-gāhoñ se niklo dikhā.eñ tumheñ

ham ne dekhe haiñ ġham se niDhāl aadmī

fikr us ko nahīñ par haqīqat hai ye

har ghaḌī ho rahā pā.emāl aadmī

ḳhaak hai ḳhaak hī meñ hai milnā use

phir bhī kartā hai kyā kyā majāl aadmī

ham parindoñ se 'ash.har' hai kyā dushmanī

har qadam pe bichhātā hai jaal aadmī

kar gaya kya koi intiqal aadmi

log kahte hain tha ba-kamal aadmi

apni rifat pe KHud hi hai dal aadmi

shan ye hai ki hai be-misal aadmi

baiTh jaega thak-haar kar ek din

aur kuchh din karega dhamal aadmi

sar pe hoti nahin jab KHushi key rida

oDh leta hai kitne malal aadmi

karte karte sawalat hal jism ke

ban gaya aaj KHud hi sawal aadmi

dur kaisa hai aaya kahan DhunDiye

ab to milte nahin KHush-KHisal aadmi

aish-gahon se niklo dikhaen tumhein

hum ne dekhe hain gham se niDhaal aadmi

fikr us ko nahin par haqiqat hai ye

har ghaDi ho raha paemal aadmi

KHak hai KHak hi mein hai milna use

phir bhi karta hai kya kya majal aadmi

hum parindon se 'ashhar' hai kya dushmani

har qadam pe bichhata hai jal aadmi