kar gaya mere dil-o-jaan ko moattar koi

kar gayā mere dil-o-jāñ ko mo.attar koī

chhū ke is tarah se guzrā mujhe aksar koī

jitnī nazreñ thiiñ usī shaḳhs meñ uljhī huī thiiñ

jā rahā thā sar-e-bāzār sambhal kar koī

kaun sā hādisa guzrā nahīñ us par is baar

aur vo hai ki shikāyat nahīñ lab par koī

dil ko dil un kī nigāhoñ ne banāyā varna

aisā be-dard thā dil jaise ki patthar koī

chāñd tāroñ pe nazar Thahre to yuuñ lagtā hai

tere jaisā hai pas-e-parda-e-manzar koī

vaqt Thahrā huā lagtā thā sar-e-rahguzar

is tarah dekh rahā thā mujhe muḌ kar koī

husn shīrīñ meñ bhī thā husn to azrā meñ bhī thā

na huā mere trahdār kā ham-sar koī

aa.ina apne muqaddar pe na kyuuñ naaz kare

muḌ ke ik baar use dekhe jo sañvar kar koī

kitne tūfān chhupe haiñ tah-e-har-mauj 'bashīr'

aaj kā daur hai yā jaise samundar koī

kar gaya mere dil-o-jaan ko moattar koi

chhu ke is tarah se guzra mujhe aksar koi

jitni nazren thin usi shaKHs mein uljhi hui thin

ja raha tha sar-e-bazar sambhal kar koi

kaun sa hadisa guzra nahin us par is bar

aur wo hai ki shikayat nahin lab par koi

dil ko dil un ki nigahon ne banaya warna

aisa be-dard tha dil jaise ki patthar koi

chand taron pe nazar Thahre to yun lagta hai

tere jaisa hai pas-e-parda-e-manzar koi

waqt Thahra hua lagta tha sar-e-rahguzar

is tarah dekh raha tha mujhe muD kar koi

husn shirin mein bhi tha husn to azra mein bhi tha

na hua mere trahdar ka ham-sar koi

aaina apne muqaddar pe na kyun naz kare

muD ke ek bar use dekhe jo sanwar kar koi

kitne tufan chhupe hain tah-e-har-mauj 'bashir'

aaj ka daur hai ya jaise samundar koi