kar ke aazad har ek shahpar-e-bulbul katra

kar ke āzād har ik shahpar-e-bulbul katrā

aaj sayyād ne ek aur nayā gul katrā

jeb-katroñ meñ hai mash.hūr sabā-bādī chor

sub.h ġhunche kā jo kiisa ba-ta.ammul katrā

dekh Tik apne garebān meñ muñh Daal ke shaiḳh

hirs ke haath se dāmān-e-tavakkul katrā

panja-e-mehr banā shāna-e-mashshāta-e-sub.h

mah-jabīñ tū ne juuñ hī rishta-e-kākul katrā

leñge murġhān-e-chaman ḳhāk-e-gulistāñ kā sabaq

bāġhbāñ jab ki ḳhizāñ ne varaq-e-gul katrā

kis qadar tez hai miqrāz-e-suḳhan terī 'nasīr'

gosh-e-hosh o ḳhirad-e-tālib-e-āmul katrā

kar ke aazad har ek shahpar-e-bulbul katra

aaj sayyaad ne ek aur naya gul katra

jeb-katron mein hai mashhur saba-baadi chor

subh ghunche ka jo kisa ba-tammul katra

dekh Tik apne gareban mein munh Dal ke shaiKH

hirs ke hath se daman-e-tawakkul katra

panja-e-mehr bana shana-e-mashshata-e-subh

mah-jabin tu ne jun hi rishta-e-kakul katra

lenge murghan-e-chaman KHak-e-gulistan ka sabaq

baghban jab ki KHizan ne waraq-e-gul katra

kis qadar tez hai miqraaz-e-suKHan teri 'nasir'

gosh-e-hosh o KHirad-e-talib-e-amul katra