kar ke dil-e-nalan se mere saz kisi ne

kar ke dil-e-nālāñ se mire saaz kisī ne

dī hai mujhe parde se ye āvāz kisī ne

is dil kā hai jo dard vahī jaan hai dil kī

samjhā na kabhī ishq kā ye raaz kisī ne

vā bāb-e-qafas aur huuñ maiñ bāb-e-qafas par

jaise ki uḌā lī par-e-parvāz kisī ne

taqdīr meñ jo kuchh mirī hañsnā hai ki ronā

baḳhshā vahī dil ko mire andāz kisī ne

har ashk kā qatra thā fasāna mire dil kā

dekhā na mirā dīda-e-ġhammāz kisī ne

dī mujh ko taḌap vo bhī ba-qadr-e-dil-e-betāb

maiñ kyā ki ye samjhā na tirā raaz kisī ne

har sher hai Duubā huā tāsīr meñ 'kaifī'

baḳhshā hai mujhe ḳhāma-e-e.ajāz kisī ne

kar ke dil-e-nalan se mere saz kisi ne

di hai mujhe parde se ye aawaz kisi ne

is dil ka hai jo dard wahi jaan hai dil ki

samjha na kabhi ishq ka ye raaz kisi ne

wa bab-e-qafas aur hun main bab-e-qafas par

jaise ki uDa li par-e-parwaz kisi ne

taqdir mein jo kuchh meri hansna hai ki rona

baKHsha wahi dil ko mere andaz kisi ne

har ashk ka qatra tha fasana mere dil ka

dekha na mera dida-e-ghammaz kisi ne

di mujh ko taDap wo bhi ba-qadr-e-dil-e-betab

main kya ki ye samjha na tera raaz kisi ne

har sher hai Duba hua tasir mein 'kaifi'

baKHsha hai mujhe KHama-e-eajaz kisi ne