kar liya mahfuz KHud ko raegan hote hue

kar liyā mahfūz ḳhud ko rā.egāñ hote hue

maiñ ne jab dekhā kisī ko bad-gumāñ hote hue

maslahat-koshī mirī fitrat meñ shāmil hī na thī

dhuup meñ jhulsā kiyā maiñ sā.ebāñ hote hue

rafta rafta raunaq-e-bāzār baḌhtī hī ga.ī

vaqt ke chehre pe zaḳhmoñ ke nishāñ hote hue

gar yūñhī jaarī rahā us ke sitam kā silsila

TuuT jā.ūñgā maiñ ik din saḳht-jāñ hote hue

ḳhushk hoñToñ ke sahāre mujh ko pahchānā gayā

bazm-e-sāqī meñ hujūm-e-tishnagāñ hote hue

us ke jī meñ jo bhī aayā vo mujhe kahtā rahā

aur maiñ ḳhāmosh thā muñh meñ zabāñ hote hue

dekh kar ḳhud apnī sūrat saḳht hairānī huī

jab maiñ guzrā ā.inoñ ke darmiyāñ hote hue

mahv-e-hairat ho ke 'nāzir' dekhtā hī rah gayā

lamha lamha apnī sāñsoñ kā ziyāñ hote hue

kar liya mahfuz KHud ko raegan hote hue

main ne jab dekha kisi ko bad-guman hote hue

maslahat-koshi meri fitrat mein shamil hi na thi

dhup mein jhulsa kiya main saeban hote hue

rafta rafta raunaq-e-bazar baDhti hi gai

waqt ke chehre pe zaKHmon ke nishan hote hue

gar yunhi jari raha us ke sitam ka silsila

TuT jaunga main ek din saKHt-jaan hote hue

KHushk honTon ke sahaare mujh ko pahchana gaya

bazm-e-saqi mein hujum-e-tishnagan hote hue

us ke ji mein jo bhi aaya wo mujhe kahta raha

aur main KHamosh tha munh mein zaban hote hue

dekh kar KHud apni surat saKHt hairani hui

jab main guzra aainon ke darmiyan hote hue

mahw-e-hairat ho ke 'nazir' dekhta hi rah gaya

lamha lamha apni sanson ka ziyan hote hue