kar raha hai samna tir-e-nigah-e-naz ka

kar rahā hai sāmnā tīr-e-nigāh-e-nāz kā

allah allah ye kaleja āshiq-e-jāñbāz kā

qatl hī manzūr hai gar āshiq-e-jāñbāz kā

vaar ho jaa.e koī teġh-e-nigāh-e-nāz kā

dard se ho vāsta ai ham-nafas āvāz kā

soz agar hāsil nahīñ to lutf kyā phir saaz kā

har qadam par uThte haiñ fitne salāmī ke liye

kyā qayāmat-ḳhez hai aalam ḳhirām-e-nāz kā

fāsla jitnā hai farsh-o-arsh meñ vo kuchh nahīñ

hai ziyāda se ziyāda merī ik parvāz kā

hai jabīñ merī kisī ke āstān-e-pāk par

dekhtā huuñ aaj ye manzar niyāz-o-nāz kā

jaise mere dil meñ terā dhyān hai ai ham-nashīñ

hai mirī āvāz par dhokā tirī āvāz kā

kar diyā behosh mujh ko jalva-hā-e-nāz ne

is qadar ehsāñ hai mujh par jalva-gāh-e-nāz kā

kar rahe ho tum jise pāmāl vo dil ḳhair se

āshiq-e-jāñbāz kā hai āshiq-e-jāñbāz kā

jalva-pāshī kī to husn-e-roz-afzūñ ne kahā

zarra zarra hai munavvar jalva-gāh-e-nāz kā

ab to har shai meñ vahī jalva nazar aane lagā

merī āñkhoñ meñ hai jalva jis harīm-e-nāz kā

qabr par dekhā hujūm-e-āshiqāñ to ye kahā

ham miTā deñge mazār apne shahīd-e-nāz kā

tā.ir-e-dil ko uḌā lete haiñ paikān-e-nazar

hai ye ik adnā karishma mere tīr-andāz kā

dil se jab niklī shab-e-furqat to pahuñchī arsh par

thā mirī āh-e-rasā meñ zor kyā parvāz kā

hazrat-e-mūsā jo mil jaate kahīñ 'sābir' hameñ

pūchhte kuchh haal un se jalva-gāh-e-nāz kā

kar raha hai samna tir-e-nigah-e-naz ka

allah allah ye kaleja aashiq-e-jaanbaz ka

qatl hi manzur hai gar aashiq-e-jaanbaz ka

war ho jae koi tegh-e-nigah-e-naz ka

dard se ho wasta ai ham-nafas aawaz ka

soz agar hasil nahin to lutf kya phir saz ka

har qadam par uThte hain fitne salami ke liye

kya qayamat-KHez hai aalam KHiram-e-naz ka

fasla jitna hai farsh-o-arsh mein wo kuchh nahin

hai ziyaada se ziyaada meri ek parwaz ka

hai jabin meri kisi ke aastan-e-pak par

dekhta hun aaj ye manzar niyaz-o-naz ka

jaise mere dil mein tera dhyan hai ai ham-nashin

hai meri aawaz par dhoka teri aawaz ka

kar diya behosh mujh ko jalwa-ha-e-naz ne

is qadar ehsan hai mujh par jalwa-gah-e-naz ka

kar rahe ho tum jise pamal wo dil KHair se

aashiq-e-jaanbaz ka hai aashiq-e-jaanbaz ka

jalwa-pashi ki to husn-e-roz-afzun ne kaha

zarra zarra hai munawwar jalwa-gah-e-naz ka

ab to har shai mein wahi jalwa nazar aane laga

meri aankhon mein hai jalwa jis harim-e-naz ka

qabr par dekha hujum-e-ashiqan to ye kaha

hum miTa denge mazar apne shahid-e-naz ka

tair-e-dil ko uDa lete hain paikan-e-nazar

hai ye ek adna karishma mere tir-andaz ka

dil se jab nikli shab-e-furqat to pahunchi arsh par

tha meri aah-e-rasa mein zor kya parwaz ka

hazrat-e-musa jo mil jate kahin 'sabir' hamein

puchhte kuchh haal un se jalwa-gah-e-naz ka