kar sakta hai agar wo sawalat gol-mol

kar saktā hai agar vo savālāt gol-mol

to maiñ bhī dūñgā us ko javābāt gol-mol

kuchh khol kar kahā to musībat gale paḌī

ab is liye maiñ kartā huuñ har baat gol-mol

us ne mire irādoñ ko to bhāñp hī liyā

aur kar gayā hai kaise mulāqāt gol-mol

andāza baaqī chīzoñ kā phir ḳhud hī kījiye

nāzuk kalā.ī gaal ġhazab haath gol-mol

lāhaq nahīñ huā abhī tak ham ko vo maraz

filhāl to haiñ us kī alāmāt gol-mol

anjām-e-kār honā hai ib.hām hī yahāñ

jis tarah ho rahī haiñ shurūāt gol-mol

inkār bhī nahīñ thā vo iqrār bhī nahīñ

us kā mo.āmla thā mire saath gol-mol

vāzeh surāġh haath nahīñ aaya koī bhī

bas thoḌe se mile haiñ nishānāt gol-mol

kar sakta hai agar wo sawalat gol-mol

to main bhi dunga us ko jawabaat gol-mol

kuchh khol kar kaha to musibat gale paDi

ab is liye main karta hun har baat gol-mol

us ne mere iradon ko to bhanp hi liya

aur kar gaya hai kaise mulaqat gol-mol

andaza baqi chizon ka phir KHud hi kijiye

nazuk kalai gal ghazab hath gol-mol

lahaq nahin hua abhi tak hum ko wo maraz

filhaal to hain us ki alamat gol-mol

anjam-e-kar hona hai ibham hi yahan

jis tarah ho rahi hain shuruat gol-mol

inkar bhi nahin tha wo iqrar bhi nahin

us ka moamla tha mere sath gol-mol

wazeh suragh hath nahin aaya koi bhi

bas thoDe se mile hain nishanat gol-mol