karam bhi husn ke ban kar itab guzre hain

karam bhī husn ke ban kar itaab guzre haiñ

na pūchh ishq pe kitne azaab guzre haiñ

baḌe qarīb se dekhā hai maiñ ne aaj un ko

vo sāmne se mire be-hijāb guzre haiñ

nizām-e-ishq taġhayyur-pazīr ho na sakā

vagarna yuuñ to bahut inqalāb guzre haiñ

phisal ga.e haiñ jahāñ paañv ahl-e-dānish ke

vahāñ se ahl-e-junūñ kāmyāb guzre haiñ

sabhī ne shoḳhiyāñ baḳhshī haiñ kuchh taḳhayyul ko

mire qarīb se jitne shabāb guzre haiñ

tirī nigāh-e-taġhāful to ḳhuub vāqif hai

mirī hayāt meñ kitne sarāb guzre haiñ

ham ahl-e-dil tirī rusvā.iyoñ ke pesh-e-nazar

jidhar se guzre ba-sad ijtināb guzre haiñ

tumhāre rū-e-daraḳhshāñ kī jab bhī yaad aa.ī

mirī nazar se mah-o-āftāb guzre haiñ

faroġh-e-husn-e-bahārāñ to dekhiye 'nāsir'

chaman se sho.ala-o-gul be-naqāb guzre haiñ

karam bhi husn ke ban kar itab guzre hain

na puchh ishq pe kitne azab guzre hain

baDe qarib se dekha hai main ne aaj un ko

wo samne se mere be-hijab guzre hain

nizam-e-ishq taghayyur-pazir ho na saka

wagarna yun to bahut inqalab guzre hain

phisal gae hain jahan panw ahl-e-danish ke

wahan se ahl-e-junun kaamyab guzre hain

sabhi ne shoKHiyan baKHshi hain kuchh taKHayyul ko

mere qarib se jitne shabab guzre hain

teri nigah-e-taghaful to KHub waqif hai

meri hayat mein kitne sarab guzre hain

hum ahl-e-dil teri ruswaiyon ke pesh-e-nazar

jidhar se guzre ba-sad ijtinab guzre hain

tumhaare ru-e-daraKHshan ki jab bhi yaad aai

meri nazar se mah-o-aftab guzre hain

farogh-e-husn-e-bahaaran to dekhiye 'nasir'

chaman se shoala-o-gul be-naqab guzre hain